Surne Bilbaok FIATC Girona bisitatuko du larunbat honetan, azaroaren 7an, Endesa Ligako zazpigarren jardunaldiko neurketan. Partida 19:30ean (DAZN) jokatuko da Fontajau pabiloian, eta bi taldeak dinamika desberdinekin iritsiko dira, baina norgehiagoka exijentea izango dela pentsarazten duen ibilbidearekin. Surne Bilbao zortzigarren postuan da sailkapenean, lau garaipen eta bi porrotekin; FIATC Girona, berriz, hamabigarrena da, hiru garaipenekin eta hiru porrotekin. Bi taldeek berezitasun bat dute komunean: etxean neurketarik galdu gabe daude oraindik, hiru garaipen lortuta zaleen aurrean jokatutako hiru norgehiagoketan.
Surne Bilbao Gironara iritsi da Endesa Ligako denboraldiko etxez kanpoko lehen garaipena lortu ostean, Badalonan Asisa Joventuti 78-81 nagusituta. Hirugarren laurden erabakigarri batean, bertan 29 puntu sartu zituzten beltzezko gizonek, talde bilbotarrak partidari buelta eman eta azken uneetan erabaki zen garaipena poltsikoratzea lortu zuen. Darrun Hilliard (17 puntu, 3 errebote, 3 asistentzia eta 18ko balorazioa) eta Tryggvi Hlinason (13 puntu, 8 errebote, 2 asistentzia eta 22ko balorazioa) izan ziren taldeko bi jokalaririk baloratuenak.
Bestalde, FIATC Gironak Casademont Zaragozaren aurka ligako azken partidan jasotako porrotaren ostean (107-78) helduko dio neurketari. Talde gironatarra partidari eusteko gai izan zen lehen zatian, baina atseden ostean etxekoek saskiratze ugari asmatu izanak norgehiagoka desorekatu zuen. Europako txapelketan, aldiz, Moncho Fernándezen mutilek sentsazioak berreskuratu zituzten joan den asteartean, FIBA Europe Cupen Patrioti Leviceren aurka lortutako garaipen sendoarekin (90-66). Gironak errendimendu hori etxeko lehiaketara eraman eta Fontajaun duen sendotasuna luzatu nahi izango du.
Gironan izandako aurrekaririk hurbilenak Surne Bilbaoren alde egiten du; izan ere, joan den denboraldian Fontajaun 89-93 nagusitzea lortu zuen urtarrilaren 4an. Azken laurden bikain batean erabakitako norgehiagoka hura abiapuntu izan zen bilbotarrentzat, etxeko eta Europako txapelketen artean jarraian lortutako hamar garaipeneko bolada abiatzeko. Orain, bi taldeak berriro elkartuko dira bakoitzaren dinamikei eusteko erronkarekin eta etxekoek etxean oraindik galdu gabe jarraitzeko asmoarekin. Aukera berri bat Surne Bilbaok Bilbao Arenatik urrun duen hazkundeari jarraipena emateko eta Endesa Ligan beste garaipen bat gehitzeko.